編者介話

    記得記得真記得，細細介時節，我都佇莊下頭戴到大，山林肚愛做山事摎田事，行山路長又韌，行到懶，做事緪又痶，我姆除了㧡㧡擔擔，還愛渡一群大細，非常辛苦又無奈。生活雖然艱辛，不管係做事也行路，我姆都會想辦法尋兜較快樂介事情來，使到大家較毋知恁痶，使到日子會較好過兜仔，比論講，唸童謠，念棚頭，唱山歌，也係講做令分人揣。

   我姆毋識字，毋過佢會講「一點一橫槓，兩條猴仔吊晃槓 _」分我揣係麼介字；看到田崁下，大路唇介牛屎堆，佢就會講「高山鼎崠氣湧湧，揣著分你捧_」，頭下馬毋知麼介，過後就會應講，分你自家去捧啦；去田寧做事看到guai⁺ nùg er，佢就會講「nem bu zi， nem bu zi，有肚底 ，沒肚臍_」係麼介；看著細人仔流鼻，佢就會問「兩條白狗，行到門口，手一下去，一咄就走_」係麼介意思。我俚還細，這兜令到老還記到清清楚楚，毋會毋記得。

    頭擺沒電視，也沒麼介娛樂介節目好看，上山上做事，摘茶，改林；也係講暗晡時食飽夜，長凳仔兜啊出，叔公阿伯、鄰鄰舍舍、上家下屋全都會坐兼來，唱滿山疏。「麼介恁大沒幾長，麼介細細會過崗，麼介恁大好做菜，麼介細細辣過薑 _」，「大樹恁大沒幾長，蟻仔細細會過崗，冬瓜恁大好做菜，辣椒細細辣過薑 _」；「麼介睡目乒乓聲，麼介咬人半頭青，麼介下山愛食肉，麼介下水毋驚冷 _」，「水牛睡目乒乓聲，顛狗咬人半頭青，老虎下山愛食肉，鴨仔下水毋驚冷 _」，你一句來，我一句去，講講笑笑，實在也講毋得恁多。該時節，一來會較毋知痶，一來也會增加盡多介樂趣摎知識。

    以後慢慢大咧，聽著還較多介令，長介、短介、文雅介、了詔介、魯夫介全都有。民國八十年初，退休了後得著橫山蔡苑清校長編輯介《橫山小謎語》一書，就像得著寶樣，該兩時還毋識有關於客家令整理好介資料出現過，所以非常珍貴，雖然講有盡多毋係客家令，也有部分沒客家介韻味，毋過還係非常難得。

    退休後有機會研習海陸客語古籍漢文，師長同學常都會提供盡多毋識聽過介令，經過多年來陸陸續續介記錄，資料越來越豐富，就出心摎這兜資料分門別類，彙集成冊，整理出來。

    其中內容有不少令，因為時代一直在進步，器具、用字遣詞也已多毋合時宜，一兜現代人毋識看過介東西，摎一兜沒法度體會介資料，還有兜雖然非常貼切、傳神毋過又略為粗俗介令題不得不放棄，也不在編輯內容之內，係最為引以為憾介所在。期待寧，為著因應時代介要求，希望以後能增添更多適合現代生活介令題。

    本書得到姜信淇校長、賴春蘭老師、張美容老師、衛玉蓮老師介鼓勵，並提供盡多珍貴資料，如虎添翼，增色不少，謹致上最誠摯介承蒙摎感謝。

                        詹益雲於芎林鹿寮坑    2014.5