詩就係畫，畫就係詩，＜詩經＞係一幅幅深藏佇心中介畫。詩肚，你可以去想、去體會細阿哥仔愛戀細阿妹仔，細阿妹仔思春、徬徨，公婆介感情世界，爺哀思念子女，子女依戀父母，詩人祈求社會安定、民生富足，國家介強盛等等，一一都跳到你面前寧來。 就像＜關雎＞詩中描寫佢“求之不得”介痛苦 , 斯做得佇想介裡肚接近佢；＜卷耳＞就係一個婦女思念寫佢該遠行介丈夫，佢想佢登山食酒,馬仔蹶毋挺動，長年仔著病 ,思家憂傷介樣仔 ；＜樛木＞係一首詩人用葛藟摎樛木 ,來比論一個嫁分“君子”介細妹人，這首詩仔毋就係現代該所唱介山歌裡肚時常聽著該介「入山看著樹纏藤，下山看著藤纏樹，樹死藤生纏到死，樹生藤死死也纏。」這條用來祝福新婚夫妻恩愛，白頭偕老當貼切介一首山歌。
你試看，到今有幾多用語早就存在佇詩經裡肚，「四牡」肚介「騑騑」毋就係用鞭仔擸畜牲時所發出hùi hùi滾介聲；有幾多介成語敢毋係早就佇詩經肚出現咧，就像「窈窕淑女」、「風雨如晦，雞鳴不已」「兄弟鬩于牆」等等。熟讀詩書毋單淨講可以豐富昇華我俚介心靈世界，還可以增加我俚介文學素養，一舉數得。毋過，當可惜介係，這下人已經盡少有人肯來研讀詩經咧，還較毋使講用客語來欣賞研讀。
新竹縣海陸客家語文協會自民國92年成立以來，一直都堅持為保存客家語文，推廣客家語文出錢出力。本會已經陸陸續續整理出一兜舊時私塾常用該「漢文」介典籍，就像＜海陸客語童蒙書＞、＜海陸客語唐詩三百首有聲書＞、＜海陸客語詩經＞等等介音譯本。本會將繼續努力摎＜宋詞三百首＞、＜古詩源＞、＜幼學瓊林＞、＜四書＞、＜楚辭＞等介音譯本整理出來，作為後學者學習摎參考之用。希望對傳承、發揚客家文化能略盡棉薄之力。
承蒙彭發勝老先生介教導，黃乾增先生提供徐輝老先生錄製該歸本＜詩經＞介錄音帶，在此謹致上最深介謝意。本人才疏學淺，又因為各地語音本就存在盡多沒共樣介位所，過講＜詩經＞係老頭擺介語言，所用介文字語音摎現代所使用介差別非常大，故所以雖然講花忒毋知幾多時間，改忒毋知有幾多擺，還試著有當多沒幾理想介位所，總而言之，敬請各位先進不吝指正，感激不盡。
詹益雲 2008.5於鹿寮坑 |
