有一擺，隔壁人問我，「一鳴驚人」客話愛仰般講？其實，佢乜係客人，雖然也會講客，毋過盡多客話罕得講，也儘少聽著，該講愛用著這句話介機會就還較少咧，故所以講，盡多客話就恁樣毋見忒，死忒，續沒魂沒影咧，實在還打爽。老人家常會講「毋聲就毋聲，一聲就打爛盎」，該毋就係「一鳴驚人」介意思，貼切又生趣，押韻又有內涵，你會試著客家人介老祖先仰會恁有智慧沒。
語言係一種非常奇妙介東西，看毋著，摸毋著，毋過，該又像空氣樣，無所不在，沒佢又做毋得。一隻族類介語言係摎就近介語言混著時，就會融入對方盡多介詞彙摎語音，假使講接觸面擴大時，本地語言就會吸收外來語言來豐富本身介語言，也使到本身介語言更加多采多姿，客家人就因為恁樣，語彙正會恁樣緊來緊豐富。
客家人來台灣之後摎原住民、日本人、洋人、中國大陸各省來介人交往、通婚，語言產生極大介變化，這近五十年來，政府強力推行國語政策，使到客語本來非常豐富介語彙，續大量流失忒去，客家子弟對這兜語言，盡多都毋識聽著，你愛喊佢仰般會用、會講？
我從溜仔戴佇客家莊，對這兜看毋著，摸毋著介話語非常有興趣，也非常希望摎這兜話語記錄、保存下來，希望分後輩看得識，也用得著。這份資料係針對華語介成語來翻譯整理介，所寫介不過斯客語語彙世界中介一小部分定定，沒法度容納像海樣介客語，雖然講我整理介資料，舉例、說明沒一定就合得著大家介意，我不過斯盡我滴滴介能力定定，希望先進長者不吝指教。
詹益雲 2011.10 於鹿寮坑
|
